Geguritan
NITI KAMULYAN JATI
Kagurit dining Ki Jogo Sion
08 Pebruari 2011
Kamulyan jati
Kamulyan jati dudu baskara kang gebyar-gebyar
Madangi jagad raya ing wayah rina
Dudu candra kang cahyane katon ing wayah wengi
Dudu lintang kang sumunar ing pepeteng
Dudu banda kang gawe gegere manungsa
Dudu pangkat kang gawe bingunge manungsa
Kamulyan jati uga dudu rupa kang nyengsemake ati
Kamulyan jati
Kamulyan jati ora ono ing pucuk ing gunung
kang duwur
Ora ono ing tengahing segara kang jero
Ora ono ing kapinteran kang ngedap-edapi
Ora ono ing Negara manca kang adoh
Kamulyan jati uga ora ono ing sak jeruning bumi
kang ora bisa dingerteni
Niti kamulyan jati ora kudu tapa brata
Ora kudu dadi pendeta
Ora kudu pati bengi
Ora kudu weweh banda utawa nyawa
Niti kamulyan jati uga ora kudu dadi wong utama
Kamulyan jati
Kamulyan jati sak tenane ono ing ngarsane Gusti
Nunggil kaliyan Gusti, bakal nampa kamulyan jati
Kamulyan jati bakal dirasakke ing njero ati
Ati kang nunggil kaliyan Gusti
Bakal dikebak’i kamulyan jati